ភ្នំពេញ ៖ ទីតាំងចាក់បាល់តាមអនឡាញមួយកន្លែងស្ថិតនៅផ្ទះលេខ២៣៨A ផ្លូវ៣៧១ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ នៅតែបន្តបើកលេងដោយសេរី ដោយគ្មានសមត្ថកិច្ចនៃអធិការដ្ឋាននគរបាលខណ្ឌមានជ័យធ្វើការបង្ក្រាបនោះទេ ដោយបណ្តែតបណ្តោយឲ្យមានការបើកលេងយ៉ាងគឃ្លើនយ៉ាងដូច្នេះ។
ទាក់ទិននឹងកន្លែងនេះ ម្ចាស់ទីតាំងតែងតែអួតថា គេបើកលេងល្បែងចាក់បាល់របៀបនេះជាង១០ឆ្នាំមកហើយ និងនៅគ្រប់ទីកន្លែងទាំងអស់ ក្នុងរាជធានីភ្នំពេញ ដែលគ្មានសមត្ថកិច្ចណាម្នាក់ហ៊ានធ្វើការបង្ក្រាបនោះទេ។ ការបើកសេរីយ៉ាងដូច្នេះ លោកអធិការនគរបាលខណ្ឌមានជ័យ និងលោកមេប៉ុស្តិ៍ស្ទឹងមានជ័យ៣ ហាក់គ្មានចំណាត់ការអ្វីនោះទេ នេះអាចម្ចាស់ទីតាំងខាងលើបានធ្វើការបំភ័យ ឬប្រគល់លាបសក្ការះហើយ បានជាស្ងាត់ឈឹងប្រៀបដូចចោរលួចសេះយ៉ាងដូច្នេះ។
បើគ្មានចំណាត់ការយ៉ាងដូច្នេះ ហាក់ដូចជាសេរីពេក បទល្មើសពេញបន្ទុកបិទភ្នែកធ្វើមិនដឹង លុយចូលហោប៉ៅពេញតែម្តង។ យោងតាមប្រសាសន៍សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បញ្ជាឲ្យមន្ត្រីមូលដ្ឋានធ្វើការបង្ក្រាបរាល់បទល្មើសដែលបានកើតឡើងក្នុងមូលដ្ឋាន ទោះធំក្តីតូចក្តីត្រូវតែបង្ក្រាបឲ្យខាងតែបាន។ សូម្បីតែអភិក្រមទាំង៤របស់រាជរដ្ឋាភិបាលកម្ពុជា ដែលបានដាក់ចេញមកកាលពីពេលកន្លងមក នោះដល់ពេលអនុវត្តហើយ គឺងូតទឹក ដុសក្អែល ព្យាបាល វះកាត់ ហើយពេលនេះដល់ពេលវះកាត់ហើយ។
ប្រជាពលរដ្ឋទូទៅបានលើកឡើងថា ប្រសិនបើបណ្តោយឲ្យកន្លែងចាក់បាល់ដែលបានដាក់ជាលក្ខណះអ៊ីនធើណេត ឲ្យនៅតំណើរការនេះ តើអភិក្រមរបស់រាជរដ្ឋាភិបាលមួយនេះនៅមានប្រសិទ្ធភាពដែរឬទេ? ប្រសិនបើលោកអធិការនគរបាលខណ្ឌមានជ័យនៅបណ្តែតបណ្តោយដូច្នេះ ល្មមដល់ពេលវះកាត់ហើយ អ៊ីចឹងសូមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញទើបកាន់តំណែងថ្មី មេត្តាត្រួតពិនិត្យមើលផង៕
